Harepan nu Leutik

Unggal usik di memenan
Saban nyaring di keukeupan
Harepan bisa nyukupan
Malah mandar kahareupna bisa bukti
Keur diri mamawa harti
Mitengtrem hate sangkan teu marudah

Sela poe nyungsi peuting
Mangsa karasa asa manjangan
Lugina keur panglamunan
Ngangon kana pangharepan
Ngumbar ku susuganan
Keur muka lega na hate
Tong pisan heureut ku seunggah

Peuting Kamari

Peuting kamari

Peuting munggaran dina taun anyar

Tanggal kahiji Muharam

Dina abad ka opat welas liwat opat windu

Waktu nu pasti jeung tangtu

Mangsa nu tara cidra datang

Wanci nu dihin geus pinasti

Nu diitung ukur isuk jeng sore

Mangsa diliwat lugina

Mangsa pisuwung hanca

Ema Mulang

Ema

Mangsa ema nincak taneuh Madinah

Kabayang sumirat rasa kabungah tina manah ema

Nu estu pagaliwota antara sedih bungah jeung

Tumaninah tetegenan dina iman

Padeukeut rasa ka nu Ngageugeuh

Tengtrem ayeng diulem ku nu kagungan

Ema

Nu unggal waktu ema ingkah

Di raudhoh ema sumringah

Unjukan ka hadrah Rasulullah

Nu micinta jeung nu dipikacinta

Kontak ilahiyah miwujud kakuatan taqwa

Marengan iman nu salawasna sumarambah

Maot

Maot
Memang ukur maot
Nu bisa mutuskeun kahayang
Megatkeun karempan
Nyacapkeun kacinta
Nyampurnakeun hirup

Maot
Panto nu teu weleh narima
Jeung bakal salawasna narima
Asupna kahirupan kana lawang maot
Moal bisa mundur mulang
Moal bisa minge heula
Moal bisa maksa asup
Moal bisa mirusa tiheula

Haji Ema

Ma
Ieu kuring anak ema rek munjungan
Munjungan nu kaelatan
Talangke neangan hade
Suda na miharep pang du'a
Leuir pisan kana waci
Samporet keur nyare'at

Ma
Ayeuna kuring manjing kaduhung
Ieu hate rasa teu nangan
Hirup jauh tina pangharepan
Mun bisa wasa sarta kawasa
Hayang lila sosonoan
Hayang midang malik midayung
Mirig balik mipir wanci
Neang jalan dibalikan
Nyorang deui ngamimitian

Wanci Mati

Can mangkuk sapajodogan
Can nepi sapangrenghapan
Kiceup can anceg beunta
Unggeuk can parat tanggah
Lieuk can linggih malik

Izrail geus sigep manten
Nyawa nu kamari panganten
Keur senang nyanding kaputren
Masih asih nyindang geten
Hese nawar taya hapunten
Nyawa leupas teu katangen
 

Heueuh Maot

Heueuh maot pisan

Teu nyaho wanci kiwari

Rek peuting rek beurang

Sore atawa isuk bisa datang

Keur sare atawa hudang

Keur susah atawa senang

Heueuh maot pisan

Tara mere beja heula

Can pernah permisi heula

Teu keur kumaha

Teu nyaho urang can mitembeyan

Teu apal urang can hahagetan

Papanggungan

Hareudang
Bayeungyang
Neuteup panggung nu pada migandrung
Ngatrakeun watek kamanusan
Ngajirim dina sisi kalindihan
Hiji dua geus niat silih paehan
Miceun heman ngalobakeun pacengkadan

Panggung pinuh ku pandungdung
Negbrehkeun heman nu ilang
Teu malire kana wiwirang
Silik tampik silih tarajang
Nu lalajona milu perang

Pangedulan

Wanci subuh geus jauh na tungtung
Sumirat cahaya carangcang tihang
Wanci niti ninggang ka beurang
Waruga nampuyak hese rek oyag
Neang kahayang nu can kasorang

Humandeuar mawa hawa nu teu hegar
Mungkus hayu pikeun nyumputkeun haliwawar
Nyingkah lengkah keur neang tarekah
Pukah tur cekah samemeh ingkah
Teu surti kana kabutuh diri
Teu ngarti kana wawatek raga

Panungtungan (2)

Laa ilaa ha illaallooh
Laa ilaa ha illaallooh
Lapad nu ngagalura awor jeung sora ceurik
Nu hese dipingit-pingit
Ngagiring rasa miris
Ati nyeri lir diiris hinis

Najan beungeut manco
Mawa rasa siga nu jago
Waruga nu salawasna ngogo
Ayeuna rek mawa poho

Panungtungan (1)

Anaking
Yap kadarieu sing deukeut
Ema menta karep kahidep
Meungpeung masih bisa wasiat samemeh ema pegat
Meungpeung masih bisa papatah samemeh ema paeh

Anaking
Sing inget, hirup di dunya teh ukur ngumbara
Kudu loba pepelakan pikeun pibekeleun
Neang tarekah keur mopolah sawah
Sawah nu salawasna kudu ngemploh
Leubeut ku ranggeuyan
Ngeusi ku beubeutian

Tung tung renghap

Duh Gusti nu Agung
Awaking rasa kaduhung
Mapay polah nu lawas
Ngumbar lampah nu kaliwat
Estu waruga nu taya ma'na
Leungit arti ti bihari
Sosonoan kana dosa
Rumawat kana maksiat