Ema Mulang

Ema

Mangsa ema nincak taneuh Madinah

Kabayang sumirat rasa kabungah tina manah ema

Nu estu pagaliwota antara sedih bungah jeung

Tumaninah tetegenan dina iman

Padeukeut rasa ka nu Ngageugeuh

Tengtrem ayeng diulem ku nu kagungan

Ema

Nu unggal waktu ema ingkah

Di raudhoh ema sumringah

Unjukan ka hadrah Rasulullah

Nu micinta jeung nu dipikacinta

Kontak ilahiyah miwujud kakuatan taqwa

Marengan iman nu salawasna sumarambah

Ema

Di lengkobna arofah lir lautan ngawadah

Pating gerendeng ngarapal do'a nu pinuh ka himeng

Nitih niat ngalaksanakeun panghajian

Mirig pangharepan pangampunan

Sumujud sumerah kana kalemahan

Teu gaduh wasa kawasa

Tiwit lemah mulang lemah

Arofah lir sagara karomah

Ema

Liwat rukun yamani mabit di muzdalifah

Lain tanaga nu kudu kawasa

Ukur ku hate anu kuat pengkuh

Komo na mangsana towaf nu loba silih seredna

Kabayang ema ngembing tatali

Nyinglah raga paya teu ka gence't

Ema teu gimir mawa wawanen

Pikeun ngelehkeun karempan kamelang

Ema
Miharep bisa nyium ka batu hideung
Hajar aswad tea ngarana
Lain rek nyembah ngahamba kana batuna
Tapi nyusud tapak pang nyium ti Rasulna

Tada teuing bungahnya
Bisa nurut tapak Nabi na
Muhammad nu jadi kakasihna

Ema

Malengpeng jumroh lir ngahurup syetan ku tujuh kakuatan

Nu salawasna kulayaban

Mitebar na mangmang ka teu yakinan

Ngabeungkeut sakuriling bungking ku angkara jeung kamurkaan

Kaingkaran tur kakufuran

Nu teu weleh mergasa

Di jero jeung luar kurungan

Ema

Ayeuna tamat kabehna parukunan

Ema mulih mawa kahemanan

Nu nyungsi na pangawakan

Mingpin hate nu leukeunan

Nuluykeun kamabruran

Mabrurna ema mabrur nu salawasna

Ngadegkeun haji dina jero pribadi

Ema
Ayeuna geus mulang
Bari mawa pangharepan
Nyungsi kana kawaluyaan
Cindek di kasinugrahaan
Kadeudeuh tinu kagungan
Alloh ta'ala nu pinuh kaheman

Tipanyingkiran, 23 November 2011