Peuting Kamari

Peuting kamari

Peuting munggaran dina taun anyar

Tanggal kahiji Muharam

Dina abad ka opat welas liwat opat windu

Waktu nu pasti jeung tangtu

Mangsa nu tara cidra datang

Wanci nu dihin geus pinasti

Nu diitung ukur isuk jeng sore

Mangsa diliwat lugina

Mangsa pisuwung hanca

Urang manusa ngan ukur ngagogog omong

Teu harti teu bukti

Tarekah rea di teang teu dijirim jadi tamba

Nyungsi elmu kunu ngaji

Meunangna saukur pinuji

Nguber ubar unggal hibar

Awak talangke hese rek make

Nu antuk ambruk teu puguh lumbuk

Urang manusa ngan saukur ngitung

Dina mangsa ganti taun

Nyumponan jumlah keur ngitung umur

Pangrasa umur geus kolot kalakuan mah miorok

Cenah mah umur nu manjangan

Nu jelas beuki mondokkan

Loba teh ukur itungan

Nu pasti beuki ngurangan

Urang manusa nu pinuh ku sarakah

Hayangna ngamilik dunya ku sorangan

Pangrasa bakalna betah tumaninah

Tiisuk nepi ka isuk

Gilir sore nepi ka sore

Peuting jempling ku teu eling

Mangsa sepi babakti

Nyorang tanaga nu dibabawa

Keur ngancik nyungsi dudunya

Padahal dunya ukur pang bibita

Hate anu salawasna sare

Simpe dihalangan lalangse

Miang-miang mimiti hudang

Ngawuwuh panggeuing nu tacan leuir

Ngoneal nyungsi ka jati

Nu lila henteu ka riksa

Mimiti tanggal hiji

Peuting kamari

 Tipaniisan, 1 Muharram 1433 ~ 27 Desember 2011.