Kaseunggah

Geugeumeueun mun tea mah pernah ngasaan
Lampah nu kaalaman sababaraha kali
Hareugeueun seungah rek nganghareupan deui
Rasana jeung rupana can elat poho kana pikiran
Ebreh jelasna kaseunggah bet kaalaman deui

Beubeungeutan

Deuh beungeut
Anjeun milawas mangsa ku moyankeun diri
Golepak ngénca jeung ngatuhu
Murulukeun waktu miceunan mangsa
Huleng jeung jentul ukur nu jadi kasabna
Taya sudana unggal nyaring

Sakolebat

Asa cik keneh

Basa urang mimiti wawuh lebah parapatan

Basa anjeun metot teuteup kuring

Basa anjeun meruhkeun rasa

 

Barieukeun

Heueuh
Ari jalma pasti keuna ku owah gingsir
Aya mangsa bungah aya mangsa susah
Datang mangsa gering ganti mangsa cageur
Ronghe'ap kadaek jebul kakedul
Kitu jeung kitu pamolahna


Heubeul pisan heuleutna antara kadaek kahalangan pangedulan
Sanajan kokolebatan ngahelaran
Angger
Can datang mah kahayang teu mungguhan uget
Sugan
Ayeuna keur luang na loba
Pikir nyampeur nu tadi teu di sorang
Malah mandar napelkeun deui kamonesan renghap
Nu kungsi nyubadanan susurupan

Mun ras inget
Teu kawawa sajung-jungeun
Rek matrikeun nu kacatet dina pikir
Murulukeun nu nyangheuy na keupeul
Me'h bisa medar peperenian nu can ka koreh

Yap ayeuna mangsana
Tigin kana jangji
Ngamimitian medarkeun jariji
Sanajan mirig susuganan
Kahayang mah manjang salawasna

Heueuh
Susuganan

Bandung, 24 Maret 2015