Beubeungeutan

Deuh beungeut
Anjeun milawas mangsa ku moyankeun diri
Golepak ngénca jeung ngatuhu
Murulukeun waktu miceunan mangsa
Huleng jeung jentul ukur nu jadi kasabna
Taya sudana unggal nyaring


Deuh beungeut
Mileuleuheungkeun mun tea mah aya cai nu ngawudluan anjeun
Ngajongklokeun hulu nyusud tuur muru sujud
Ngulengkeun uteuk kana Dzat Gofur
Satungtungna mibanda hampura
Ngaguar lalangse dosa nu jadi panghalang

Deuh beungeut
Mun tea mah kasampeur mangsa taya raga
Rep sirep sidakep rékép munjungg Nu Maha Agung

Seuseuh rasa mokaha sina jadi rasa misaha

Peureut cai mangmang nepi ka garing ku yakin

Kibringkeun kasulayaan ku pasini janji ka Ilahi

Deuh beungeut

Sing inget purwadaksina

Wujud nu jirim bakal balik jadi jisim

Tekah paripolah di bungkus di anteurkeun kanu ngayuga

Keur dijadikeun saksi di pangadilan tanggung jawab