Harewos ti Jinis

Tuur nu ngajujugur karep ditangkeup
Hésé rék ngoléséd
Gado nu nagog kahayang ditanggeuy
Nyangheuy numpang teu mungpang
Mata caleuy teu puguh neuteup jugjugan
Kulayaban neang ka jero taya raratan

Estuning pikir hese ngancik kana lilir
Mérénan kahayang nu teu kongang
Balatak mancawura teu kawadahan

Rus ras rasa jeung pikir leupas tina dzikir
Malengos teu bisa di peperuh ngaos

Keun anteur meureun bener
Bral ngencar malar jembar
Moal risi mun nyungsi leuwi
Hamo melang tinemu pedang
Jugjugeun nunggu nu kuuleu

Lain beja nu can nyata
Lain cenah nu teu merenah
Tapi hiji tina sewu bukti
Sakeprul usul tina saukur ngajejentul
Pikeun neang sajati bukti
Nu bisa mindah mindah bakti

Heubeul saukur netela waktu
Ngoréh poé nungguan tanwandé
Susuganan ngalurana wujud usaha
Barokah jeung rohmah pastina sumarambah
Meunang jeung eleh teu jadi ukuran
Pasti syukur nu nyurup jeun kujur